(حوارى مع الدنيا ) الشاعر -جمال الكون 

(حوارى مع الدنيا )

الشاعر -جمال الكون

قالت انا بنصارحك في لحظة أذهول
واحس بآخر ما تقوله بونّه

قلت ابتدى واللي يجي منك مقبول
تفضلي قولي تفاصيل عنه

قالت صحيح ان كل شي له اصول
وان الليالي حكمهن يفرضنّه

قلت الله اللي ميّز الناس بعقول
وكل له اسلوبه وذوقه وفنّه

قالت ابي قلب البشر ماله ميول
قلت البشر يمشي برايه وظنّه

قالت وحب النفس لو صار مجهول
مشاعري غصب عليّ يكتمنّه

ودّي على وصله وحبه على طول
لكن مقادير الزمن باعدنّه

واليوم بالي من سبايبه مشغول
في ذمتي وصله على القلب جنّه

قلت الغلا مثل الحيا كنّه سيول
حسب القلوب وحسب ما يشتهنّه

والوصل بالقسمة وله عدة حلول
امّا على الكتمان .. .. والاّ بسنّه

قالت واذا ما الله قسم.. قلت لاحول
يبقى لهن حلن وهن ما يبنه

يبقى الفراق اللي علي صاحبه هول!
والبعد لو ما كلهن ..يرغبنّه

قالت بدا ..في خاطري شي يجول
واخاف تزعل يابن الاجواد منّه

قلت الكلام ان صار لينّ معسول
لا يجرح العاشق ولا فيه مّنه

قالت نويته..واسكتت بآخر القول
قلت الفراق .. .. وقالت الظاهر ..إنّه..!!
Jamal AlQawn AlQawn