بلاش الظلم — محمد رجب

قصيدة (بلاش الظلم)
__________‘_______

فاكر نفسك مالِك مالَك
بكرة هيبقى حالك حالك
لما تدور على اى مسالك
بردو بظلمك منتش سالك
************
اجرى وكوش زود مالك
ابنى وعلى دُور فوق دارك
اكذب واسرق واذى ف جارك
واشهد زور واحلف بالمالِك
*************
انت بتكذب مش على بالك
فاكر ان الدنيا جيالك
اصحا وفوق مش ديمالك
اصل الدنيا مش على قدك
*************
بكرة تسيبها وتدخل قبرك
الكل هيرجع ويسيبك
مش باقى معاك غير عملك
لو عملك صالح يا هناك
************
الجنه هتشوفها هناك
والعمل الصالح وياك
دعوات ولادك توصلك
ورعاية المولى ترعاك
************
واما يكون نار ومهالِك
اى طريق من دول سالك
اختار وانت مالِك نفسك
قبل ما ييجى الموت ويفاجئك